Milli Məclisin sədri: "Azərbaycanla təzyiq dilində danışmaq olmaz"
Digər
4 Oktyabr 2017 19:52

Milli Məclisin sədri: "Azərbaycanla təzyiq dilində danışmaq olmaz"


 

Milli Məclisin sədri Oqtay Əsədov Bakıda səfərdə olan Avropa İttifaqının Siyasi və təhlükəsizlik komitəsinin sədri Volter Stevensin başçılıq etdiyi nümayəndə heyəti ilə görüşüb.

 

MM-dən APA-ya verilən məlumata görə, O. Əsədov bildirib ki, Azərbaycan Avropa İttifaqı ilə əlaqələrin inkişafında maraqlıdır: “Son dövrlər tərəflər arasında müsbət dinamika müşahidə olunmaqdadır. Aİ ilə Azərbaycan arasında vaxtilə imzalanmış saziş bu günün reallıqları ilə uyğunlaşmır. Buna görə də tərəflər arasında yeni sənədin imzalanması üzrə danışıqlar aparılır. Ümid edirəm, Azərbaycanla Avropa İttifaqı arasında münasibətlərin daha da dərinləşməsinə maneə törədən hallar tezliklə öz məntiqi həllini tapacaq. Çox təəssüf ki, son bir neçə ayda münasibətlərimizə xələl gətirmək istəyən  qüvvələr yenidən fəallaşaraq, Azərbaycanı Avropa İttifaqından kənarda tutmaq üçün  səylər göstərirlər. Biz hər zaman bərabərhüquqlu, qarşılıqlı hörmətə əsaslanan əməkdaşlığa tərəfdar olmuşuq. Ancaq bir sıra Avropa qurumları tərəfindən ölkəmizə yanaşmada ciddi gərginliyə səbəb ola biləcək addımlar atılmaqdadır. Bizə təzyiq etmək istəyən qüvvələrə dəfələrlə sübut etmişik ki, Azərbaycanla siyasi təzyiq dilində danışmaq olmaz”.

 

O. Əsədov qeyd edib ki, AŞPA və Avropa Parlamenti tərəfindən Azərbaycanla bağlı sənəd qəbul etmək artıq ənənə halını alıb: “İnsan hüquqları ilə əlaqədar müxtəlif mətbu orqanlarda dərc olunmuş yazılar əsasında ölkəmizlə bağlı belə addımların atılması qəbuledilməzdir. Belə məsələlərdə rəsmi qurumların da fikrini öyrənmək daha obyektiv olardı. Azərbaycan hakimiyyəti ölkədə insan hüquqlarının qorunması, demokratiyanın daha da möhkəmlənməsi üçün gərəkli olan addımları atır. Demokratiya, insan haqları, qanunun aliliyi kimi prinsipləri regional, siyasi reallıqlardan və təhlükəsizlik anlayışından kənarda dəyərləndirmək olmaz. Bu, gələcəkdə çox ciddi fəsadlar törədə bilər. Təbiidir ki, hər bir ölkədə bəzi sahələrdə çatışmazlıqlar da vardır. Bizi tənqid edən Avropa ölkələrinin özlərində də müxtəlif sahələrdə problemlər mövcuddur. Lakin onların məhz Azərbaycanda olan bir sıra nöqsanları qəsdən şişirtməsi və beynəlxalq təşkilatları da buna alət edərək ölkəmizə təzyiq göstərməsi anlaşılan deyil. İkili standartlara son qoymağın vaxtı çoxdan çatıb”.

 

MM sədri fikirlərinin təsdiqi kimi Avropa Şurası baş katibinin və ATƏT PA-nın Cənubi Qafqaz üzrə xüsusi nümayəndəsinin bu mövqedən çıxış edərək, atdıqları addımlara diqqət çəkib: “Ölkəmiz beynəlxalq qurumlar qarşısında götürdüyü öhdəliklərə sadiqdir. Milli Məclisdə Avropa Şurasının onlarla konvensiyası ratifikasiya olunub. Çox təəssüf ki, insan hüquqları haqqında ağzıdolusu danışan bəzi siyasətçilər Azərbaycanın 20 faiz torpağının işğal olunmasına, 1 milyon insanın öz yurdlarından didərgin düşməsinə, Xocalısoyqırımına göz yumurlar. BMT Təhlükəsizlik Şurasının, AŞPA-nın, AP-nin və digər beynəlxalq qurumların Dağlıq Qarabağla əlaqədar qəbul etdiyi qərar və qətnamələrin yerinə yetirilməməsinə biganə yanaşırlar. Bu kimi hallar haqlı olaraq ölkə ictimaiyyətində suallar doğurur. Azərbaycanın yerləşdiyi regionu tanımayan, mövcud geosiyasi reallıqlardan xəbərsiz insanların bölgədə baş verən hadisələrə qiymət verməsi ən azından qeyri-ciddi bir hərəkətdir. Az-çox məlumatı olan hər kəs Dağlıq Qarabağ münaqişəsinin bölgə ölkələri üçün, xüsusilə də Azərbaycan üçün siyasi yükünü yaxşı başa düşür. Məhz buna görə də  ayrı-ayrı təşkilatların və siyasətçilərin Azərbaycana davamlı təzyiqləri fonunda Ermənistana münasibətdə loyallıq göstərmələri çox qəribədir. Ümid edirik ki, gələcəkdə belə hallarla rastlaşmayacağıq. Biz bütün beynəlxalq qurumlarla bərabərhüquqlu əməkdaşlığa hazırıq”.

 

Volter Stevens isə diqqətə çatdırıb ki, görüşdə Aİ-yə daxil olan 28 ölkənin səfirləri iştirak edirlər: “Mən Azərbaycana ölkəmin ATƏT-ə sədrliyi dövründə səfər etmişəm, budəfəki gəlişimdə isə böyük dəyişikliklərin və inkişafın şahidi oluram. Noyabr ayında “Şərq Tərəfdaşlığı” çərçivəsində Brüsseldə böyük bir tədbirin keçirilməsi nəzərdə tutulub”.

 

Qonaq təmsil etdiyi qurumla Azərbaycan arasında yeni saziş üzərində işin başlanmasından məmnunluq duyduğunu ifadə edib.  O qeyd edib ki, Azərbaycan Avropada öz tolerantlığı ilə seçilən, müxtəlif sivilizasiyaların qovuşduğu bir məkan kimi tanınır.

loading...

OXŞAR XƏBƏRLƏR

DİGƏR XƏBƏRLƏR

TOP XƏBƏRLƏR

Astroloji proqnoz - 19 oktyabr

Astroloji proqnoz - 19 oktyabr

19 Oktyabr 2017 00:13
Astroloji proqnoz - 20 oktyabr

Astroloji proqnoz - 20 oktyabr

20 Oktyabr 2017 00:08
SSRİ haqqında 10 GİZLİ FAKT

SSRİ haqqında 10 GİZLİ FAKT

16 Oktyabr 2017 08:04
Astroloji proqnoz - 16 oktyabr

Astroloji proqnoz - 16 oktyabr

16 Oktyabr 2017 00:08
Astroloji proqnoz - 15 oktyabr

Astroloji proqnoz - 15 oktyabr

15 Oktyabr 2017 00:08
loading...