"Ögey ana" filmindəki illərdir gizli qalan SİRR açıldı - VİDEO - FOTO
Şou-Biznes
28 İyul 2017 21:14

"Ögey ana" filmindəki illərdir gizli qalan SİRR açıldı - VİDEO - FOTO


Azərbaycan kinosunun incisi sayılan "Ögey ana" filminə elə bir azərbaycanlı yoxdur ki, baxmasın. Filmlə birlikdə məşhurlaşan "Kəndimiz" mahnısı haqda da yəqin ki, məlumatınız var. Müsahibimlə tanış olmayana qədər mən də bir çoxlarınız kimi bu mahnının Ceyhun Mirzəyevin ifasında olduğunu bilirdim. Demək ki, sizin kimi mən də yanılmışam. Milli.Az sizə bu gün "Kəndimiz" mahnının gerçək ifaçısını tanıtdıracaq. İllərdir gizlin qalan bu sirrə bizimlə birlikdə dövrünün tanınmış müğənnisi Mənsumə Atamova aydınlıq gətirəcək.

- Mənsumə xanım, sizi yəqin ki, mənim kimi bir çoxları tanımır. İstərdim özünüzü oxucularımıza təqdim edəsiniz.

- Mən Mənsumə Atamova Bakıda anadan olmuşam. "Ögey ana" filmindəki "Kəndimiz" mahnısını mən ifa etmişəm. Uşaqlıqdan musiqiyə, sənətə həvəsim olub, sadəcə atam ağır xasiyyətli bir insan olduğundan məni musiqidən məhrum etmişdi. Məktəbdəki rus dili müəlliməm atamdan xahiş edib, məni o vaxtkı pioner evinə yazdırsın. Orada məşhur musiqi xadimi Əfsər Cavanşirovdan dərs almışam.

- "Kəndimiz" mahnısını ifa edərkən bilirdinizmi filmdə Ceyhun Mirzəyevin ifasında gedəcək?

- Uşaq olsam da təbii ki, bilirdim. Hər şeylə maraqlanan, hər bir şeyi bilmək istəyən bir uşaq idim. Həmkarlarımdan bu xüsusiyyətimə görə seçilirdim. Filmin bəstəkarı Tofiq Quliyev Əfsər müəllimə zəng edib, film üçün uşaq səsi istədi. Əfsər müəllim məni Tofiq Quliyevin studiyasına göndərdi. Studiyada mənə qulaq asan Tofiq Quliyev səsimə vuruldu. Həmin o mahnını mən böyük estrada orkestri ilə, mikrofonsuz oxudum. Hamı kənardan dayanıb, təəccüblə mənə baxırdı. "Kəndimiz" mahnısı uşaq üçün çox çətin mahnı idi. Orada elə boğazlar var idi ki, oxumaqda çətinlik çəkirdim. Amma nəticədə gözəl bir mahnı alındı.

- Ceyhunla tanışlığınız var idi?

- Əlbəttə, tanışlığım var idi. Ceyhun məndən çox razı idi, həmişə məni görəndə deyirdi ki, çox gözəl səsiniz var. Uzun illər sonra mən "5 mərtəbə"də Ceyhunla rastlaşdım. O məni filmlərində həm aktrisa, həm də müğənni kimi görmək istədiyini bildirdi. O zaman da qayınanalı-qayınatalı evdə idim. Qorxurdum ki, birdən razılıq verərəm, onlar etiraz edərlər.

- Bəs niyə uzun illərdir bu mahnını sizin oxuduğunuzu heç kim bilmirdi?

- Düzgün qeyd etdiniz, çox insan bilmirdi. Deyirdilər ki, Şövkət oxuyub, Nərminə xanım oxuyub. Mən tanınmırdım deyə adımı da demirdilər heç. İndi də elə bilirlər ki, bu mahnını Ceyhun oxuyub. Halbuki Ceyhunun heç vaxt səsi olmayıb. O aktyor kimi məşhur olub. Sadəcə olaraq, məni heç kim tapa bilmirdi. Bir neçə il əvvəl "10-dan sonra" verilişində mən bütün bu şayiələrə aydınlıq gətirdim. Hətta bu mahnını Moskvada rusca da oxumuşam.

- Sonradan fəaliyyətinizi davam etdirməməyinizi həyat yoldaşınız istədi, yoxsa özünüz?

- Mənim həqiqətən də bu sənətə həvəsim böyük olub. Hətta qonşuları başıma yığıb, mahnılar oxuyub, səhnəciklər göstərirdim. Vaxtında atam yolumu bağladı, sonra isə ailə həyatı qurdum, başım övladlarımı böyütməyə qarışdı. Yoldaşımın çox gözəl xasiyyəti var idi. Mənə deyirdi ki, istəyirsən get oxu. İndi mən özüm üçün evdə oxuyuram.

- Peşman deyilsiniz?

- Xeyr, xanəndə olmağıma peşman deyiləm. O da bir həvəs idi. Müğənnilər bir-birlərinin yolunu bağlayır, Allah bilir ki, müğənni olsaydım, nə qədər düşmənim olardı. Müğənnilər var ki, 100 mahnı oxuyur, heç biri yadda qalmır, amma mən bir mahnı ilə tarixə düşmüşəm. Mənim gözəl ailəm var. Allah onları mənə çox görməsin. Amma bəzən də fikirləşirəm ki, cavan olsaydım, heç bir qadağaya baxmayıb, sənətin dalınca gedərdim. Həftədə 3 dəfə "Ögey ana" filmini efirdə göstərirlər. "Kəndimiz" mahnısını eşidib kövrəlirəm, hərdən bir zümzümə ilə özümü sakitləşdirirəm. Mən öləndən sonra da bu mahnı yaşayacaq.

- Ailə üzvlərinizdən bu sənətdə olanlar varmı?

- Mənim 2 qızım, 1 oğlum var. Hər biri başqa sənət sahibidir. 8 nəvəm var, hal-hazırda onlar üçün yaşayıram. Mən qız övladı istəmirdim, oğul istəyirdim. Oğlum 7 ildən sonra dünyaya gəlib. Mən hal-hazırda onun ailəsi ilə qalıram.

Əli Rəhimoğlu

Milli.Az

Videonu izləmək üçün şəklə klikləyin:

Ögey ana filmindən , Kəndimiz mahnısı.










loading...

OXŞAR XƏBƏRLƏR

DİGƏR XƏBƏRLƏR

TOP XƏBƏRLƏR

Astroloji proqnoz - 15 avqust

Astroloji proqnoz - 15 avqust

15 Avqust 2017 00:13
Adriana Limadan şok etiraf

Adriana Limadan şok etiraf

10 Avqust 2017 15:02
Avqustun 21-ə HAZIR OLUN

Avqustun 21-ə HAZIR OLUN

14 Avqust 2017 10:13